!

Урматтуу Кайырбек ага, биринчиден сиз жыл сайын текшерүүдөн өтүп турушуңуз керек; эң эле аз дегенде жөнөкөй көкүрөк рентгени, тышкы дем алуу функциясын текшерүү (ФВД), эхокардиограмма (ЭХОКГ) жана кандын жалпы анализин тапшырып туруу керек. Сизди дарылап жаткан дарыгер алынган натыйжалардын негизинде гана дары жазып, ошондой эле дарылоо курсун белгилеп бериши мүмкүн.

Мындан тышкары атровент негизги препарат болуп саналат, ошондуктан аны менен бир суткада 4 жолу дем алып турушуңуз кажет, айрымдар аны приступ учурунда гана колдонуп коюшат, бул туура эмес, ошондуктан дарыгер менен такташып аны күн сайын колдонуп турганыңыз оң.

Экинчиден, жашаган жериңиз боюнча үй-бүлөлүк дарыгердин көзөмөлүндө болуңуз, зарыл болгон учурда сиздин дарыгериңиз дары-дармектердин, анын ичинде селденафилдин, атровенттин дозасын көбөйтүү же азайтуу керектигин айтат. Ошондой эле атровент менен кантип туура дем алуу керектигин билгениңиз маанилүү (эгерде буга чейин кандай колдонууга анчейин көңүл бөлбөгөн болсоңуз анда дарыгерден кантип туура дем алуу керектигин тактап алышыңыз керек болот, дарыгер аны толук үйрөтүп бериши керек).

Сизге берер кеңешибиз кайрадан Улуттук госпиталга барып текшерүүдөн өтүп, алынган жыйынтыктардын негизинде дарылануунун шарттарын тууралап алганыңыз жакшы (ал жерде пульмонология бөлүмү бар). Сизге күч кубат жана чың ден соолук каалайбыз. Республикалык ден соолукту чыңдоо жана массалык коммуникация борборунун дарыгер адиси, медицина илимдеринин кандидаты Калиева Анара Жумабековна.